Соңғы күндері жол апатынан 25 адам қаза тапты: ІІМ қазақстандықтарға арнап үндеу жасады

Соңғы күндері Қазақстанда үш бірдей ірі жол апаты болып, 25 адамның өмірін қиды. ІІМ халыққа үндеу жасап, жолдағы жауапсыздық орны толмас қайғыға соқтыратынын ескертті, деп хабарлайды Azattyq Rýhy.

Үш облыстағы ірі апаттар

• 11 қыркүйек – Маңғыстау облысында шағын автобус аударылып, 10 адам қаза тапты.
• 14 қыркүйек – Жетісу облысында үш көлік соқтығысып, тағы 10 адамның өмірі үзілді.
• Қарағанды облысында қарсы бағытқа шығу салдарынан болған апатта 5 адам көз жұмды.

ІІМ: Жол қателікті кешірмейді

«Бұл жай ғана апат емес, орны толмас адам шығындары. Жол қателікті кешірмейді!» - деп мәлімдеді ІІМ Әкімшілік полиция комитеті төрағасының орынбасары Ғалым Сарғұлов.

Жүргізушілерге негізгі ескерту

• Жылдамдықты шамадан тыс арттырмау;
• Қарсы бағытқа шықпау;
• Қауіпті маневр жасамау;
• Қауіпсіздік белдігін міндетті түрде тағу.

Бақылау күшейтіледі

Министрлік ауқымды тексерістер мен рейдтер өткізуді, қалааралық тасымал мен жеке тасымалдаушыларды қатаң бақылауды қолға алды. Көліктің техникалық жағдайына және жүргізушілердің жауапкершілігіне ерекше назар аударылмақ.

Жеке тәртіп – басты шарт

«Жолдағы қауіпсіздік тек полицияға емес, әр жүргізушінің жеке жауапкершілігіне байланысты. Бір ғана қате шешім орны толмас қайғыға әкелуі мүмкін», — деп ескертті ІІМ.