Қазақстан оқушысы экономика бойынша халықаралық олимпиадада жеңіске жетті

Астанадағы NIS-тің 11-сынып оқушысы Батырхан Мұхтархан Грекияда өткен EO-2025 халықаралық экономика олимпиадасында абсолютті чемпион атанды. Ол АҚШ, Қытай және Еуропаның үздік оқушыларын артта қалдырды. Бұл туралы ҚР Оқу-ағарту министрлігі жазды, деп хабарлайды Azattyq Rýhy. .

Олимпиада қалай өтті?

Биылғы олимпиадаға әлем бойынша 100 мыңнан астам қатысушы тіркелді. Ұлттық кезеңнен өткендердің ішінен 28 елден 128 үздік оқушы финалға жолдама алды.

Финалда қатысушылар экономика мен қаржы саласындағы:

• теориялық тапсырмаларды орындады;
• нақты жағдайларға негізделген кейстерді талдады;
• қаржылық шешімдердің моделін жасады.

Батырхан барлық кезеңнен сенімді өтіп, жалпы есепте бірінші орынға ие болды.

Жас чемпионның жетістіктері

Бұл жеңіс – Батырханның алғашқы табысы емес. Соңғы жылдары ол бірнеше ірі жарыста көзге түсті:

• Қазақстандағы экономика және қаржы бойынша республикалық олимпиада – қола;
• IEO-2024, Гонконг – қола;
•  IEO-2025, Әзербайжан – алтын;
• EFI олимпиадасы, Қазақстан – жеңімпаз.

Ал EO-2025 олимпиадасындағы жеңіс – оның ең жоғары жетістігі болып отыр.

Батырханның пікірі

«Мен үшін бастысы – жаңа нәрсені үйрену, күрделі тапсырмаларды шешу және өзімді дамыту. Жетістіктерім арқылы замандастарымды шабыттандырғым келеді», – деді Батырхан Мұхтархан.