Инклюзивті кабинеттерде балалардың білім алуына және әлеуметтенуіне барлық жағдай жасалған
Астанада инклюзияны қолдау кабинеттерінің желісі белсенді дамып келеді. Екі оқу жылы ішінде қала мектептерінде 21 кабинет ашылды. Оның 10-ы жаңа оқу жылының басында іске қосылды. Жалпы, елордадағы инклюзияны қолдау кабинеттерінде 1054 ерекше білім беру қажеттілігі бар бала көмек пен дамуға мүмкіндік алуда. Жобаның бастамашысы – «Samruk-Kazyna Trust» қоры, деп хабарлайды Azattyq Rýhy.
Инклюзивті кабинеттерде балалардың білім алуына және әлеуметтенуіне барлық жағдай жасалған. Олардың тұжырымдамасын корпоративтік қор мен инклюзия саласының сарапшылары бірлесіп әзірлеген.
Әр кабинетте логопедтер, дефектологтар, психологтар және педагог-ассистенттер жұмыс істейді. Кеңістіктер балалардың мектеп ортасына бейімделуіне, жаңа дағдыларды меңгеруіне және денсаулығын нығайтуына көмектесетін арнайы аймақтармен жабдықталған.
Мәселен, қыш шеберханасында балалардың ұсақ моторикасы мен шығармашылығы дамиды, театрлық сабақтарда олар өзгелермен қарым-қатынас жасауды, эмоцияларын білдіруді және топпен жұмыс істеуді үйренеді. Ал гидропоника аймағында оқушылар топырақсыз өсімдіктер өсіреді – бұл тек қызықты тәжірибелік дағды ғана емес, сонымен қатар экологиялық тәрбиенің маңызды бөлігі. Ол жауапкершілікті, зейінділік пен шыдамдылықты қалыптастырады.
Айта кетейік, «Samruk-Kazyna Trust» қорының жобасы арқасында елордалық ерекше қажеттілігі бар оқушылардың шамамен 40%-ы инклюзивті біліммен қамтылған.