Оқушылар оқулықпен қамтамасыз етілді
Қалалық білім басқармасының мәліметінше, мектептер толықтай оқулықтармен қамтылып, олар оқушыларға таратылып жатыр. Әлеуметтік осал санаттағы балаларға мектеп формасы берілген. Бұл туралы Azattyq Rýhy агенттігі Otyrar.kz-ке сілтеме жасап хабарлайды.
56 мыңнан астам балаға мектеп формасы берілді
Шымкент қаласы білім басқармасының басшысы Гүлназ Сүлейменованың айтуынша, республикалық «Мектепке жол» қайырымдылық акциясы аясында мемлекеттік мектептердің 56 430 оқушысы мектеп формасымен қамтылмақ. Бұл мақсатқа 2 млрд 624 млн теңге бөлінген. Қаражат тікелей ата-аналардың есепшотына аударылуда. Биылдан бастап жаңа ережеге сәйкес, жеке мектептердегі әлеуметтік осал отбасылардың балаларына да қосымша қаржы қарастырылды.
Кейбір мектептерде әлі жөндеу жұмыстары жүріп жатыр
Жаңа оқу жылы қарсаңында бірқатар мектепте жөндеу жалғасуда: еден ауыстыру, сырлау және шатырды жаңарту жүргізілуде. Биыл 10 білім беру мекемесі толықтай күрделі жөндеуден өтті, алты жаңа мектеп бой көтерді.
Жаңа оқу жылы қарсаңында жаңа мектептер ашылады
Гүлназ Сүлейменованың айтуынша, 1 қыркүйекке дейін екі жаңа мектеп ашылады. Сондай-ақ 50 мектепке қосымша корпустар пайдалануға берілмек. Бұдан бөлек, үш жаңа мектептің құрылысы жалғасуда.
Барлық мектеп 1 қыркүйекке дейін дайын болады
Шымкент қалалық білім басқармасы мектептердің дайындық барысын ерекше бақылауда ұстап отыр. Ведомство басшысының айтуынша, барлық мектептер 1 қыркүйекке дейін толық дайын болады.