Қазақстанда қыркүйекте ауа райы қандай болады

Қазгидромет қыркүйек айына арналған ауа райы болжамын ұсынды. Ай басында елдің басым бөлігінде салқын болса, кей өңірлерде жазғы ыстық сақталады, деп хабарлайды Azattyq Rýhy. 

Ай басында қысқа мерзімді суық болады

Синоптиктердің мәліметінше, қыркүйек күздің алғашқы салқынымен басталады. Әсіресе солтүстік, шығыс және орталық өңірлерде:

• түнде +3…+8 °C дейін төмендейді,
• топырақ бетінде –2 °C дейін алғашқы үсік байқалады,
• күндіз +12…+28 °C аралығында жылынады.

Ал батыс пен оңтүстік-батыста қыркүйектің басында әлі де аптап ыстық сақталады: ауа температурасы +32…+40 °C дейін жетуі мүмкін.

Бірінші онкүндікте қандай ауа райы күтіледі?

• Көптеген өңірде жаңбыр, найзағай, бұршақ күтіледі.
• Кейбір аймақтарда қатты жел соғады.
• Таулы жерлерде жауын-шашын аралас қар түсу ықтималдығы бар.

Ай ортасы мен соңы

Қыркүйектің екінші және үшінші онкүндігінде ауа райы құбылмалы болады:

• Батыста: түнде +13…+19 °C, ай соңында +2…+12 °C дейін төмендейді, топырақта –3 °C дейін үсік болады.
• Солтүстік, орталық және шығыста: түнде +1…+6 °C, ай соңында 1–6 °C үсік күтіледі. Күндіз +8…+28 °C аралығында.
• Оңтүстікте: кей күндері +30 °C-тан жоғары ыстық сақталса да, ең суық түндері –3 °C үсік болуы мүмкін. Күндізгі температура +11…+20 °C шамасында.

Синоптиктер не дейді?

«Қыркүйек айы Қазақстанға әртүрлі ауа райын алып келеді: алғашқы үсіктер мен салқын күндерден бастап жазғы ыстыққа дейін. Сондықтан тұрғындар киімін ауа райына сай үйлестіріп, алыс сапарға шыққанда болжамдарды алдын ала тексеріп отыруы қажет», – дейді «Қазгидромет» мамандары.