Ол қала әкімінің орынбасары қызметін биылғы жылдың ақпан айынан бері атқарып келді
Руслан Берденов өзінің өтініші бойынша Шымкент қаласы әкімінің орынбасары қызметінен кетті, деп хабарлайды Azattyq Rýhy.
Қала әкімдігі баспасөз қызметінің мәліметінше ол бұл қызметті биылғы жылдың ақпан айынан бері атқарып келген.
«Руслан Берденов 1985 жылдың наурыз айында Шымкент қаласында дүниеге келген. Әл-Фараби атындағы Қазақ ұлттық университетін және КИМЭП университетін «Іскерлік басқару магистрі, қаржылық менеджмент маманы» мамандығы бойынша тәмамдаған», - деп жазылған хабарламада.
Еңбек жолын 2007 жылы «Procter & Gamble LLP» компаниясында бастаған. 2010-2012 жылдары «EASTCOMTRANS» ЖШС-нің жылжымалы құрамды жалға беру департаментінің директоры, 2012-2018 жылдары «Ақ ниет» ЖШС-нің бас директоры, 2018-2019 жылдары «Ақ ниет» ЖШС-нің бақылау кеңесінің мүшесі, 2019-2023 жылдары “Aq Niet Group” бақылау кеңесі төрағасының орынбасары қызметтерін атқарды.
2023 жылдың наурызынан қала әкімінің орынбасары болып тағайындалғанға дейін Қазақстан Республикасы Парламенті VIII шақырылымының депутаты, Қаржы және бюджет комитетінің мүшесі болды.
Еске сала кетейік, 2025 жылдың 21 сәуірінде сағат 20:30 шамасында Руслан Берденовке қастандық жасалды. Ол жамбас пен иық тұсынан оқ жарақатын алып, ауруханаға жеткізілді. Шенеунікке қастандық жасаған Ернар Жиембай 9 жылға сотталды.