Қатысушылар қазақ және әлем әдебиетінің таңдаулы кітаптарын оқып, түрлі аталымдар бойынша бақ сынайды
«AMANAT» партиясының бастауымен қолға алынған «Кітап оқитын ұлт» пилоттық жобасы Шымкент қаласында да өтеді. Қала әкімі Ғабит Сыздықбеков жобаның мегополис тұрғындары үшін маңызы жайлы желідегі парақшасында арнайы жазба жариялады, деп хабарлайды Azattyq Rýhy.
Қатысушылар қазақ және әлем әдебиетінің таңдаулы кітаптарын оқып, түрлі аталымдар бойынша бақ сынайды.
«Қадірлі қала тұрғындары! Атырауда өткен Ұлттық құрылтайдың ІІІ отырысында мемлекет басшысы Қасым-Жомарт Тоқаев: «Озық ойлы ұлт болудың ең төте жолы – кітап оқу», – деп ерекше атап өтті. Шын мәнінде, бүгінгі жаһандану дәуірінде басты байлық – адам капиталы. Ал кітап оқу әдеті – уақыт талабы ғана емес, көптеген сын-қатерге жауап беретін маңызды қажеттілік.
Жуырда Мәжіліс төрағасы, «AMANAT» партиясының төрағасы Ерлан Қошанов «Кітап оқитын ұлт» республикалық пилоттық жобасының басталғанын жариялады. Алғашқы өңірлер қатарында Қарағанды мен Қостанай облыстары және Шымкент қаласы бар. Бұл – біз үшін қуанышты әрі жауапты жаңалық.
Шымкент – тек республикалық маңызы бар мегаполис қана емес, ол – тарихы терең, мәдениеті бай, білім саласының дәстүрі қалыптасқан шаһар. Сондықтан дәл осындай маңызы зор жобаның біздің қалада жүзеге асуы заңдылық», – деп жазды қала әкімі.
Айта кетерлігі, жоба мектеп оқушыларын, колледж бен жоғары оқу орнының студенттерін, ұстаздарды, отбасылық әулеттерді және мемлекеттік қызметшілерді қамтиды. Қатысушылар «Кітап оқитын мектеп», «Кітап оқитын колледж», «Кітап оқитын университет», «Кітап оқитын педагог», «Кітап оқитын әулет», «Кітап оқитын мемлекеттік қызметкер» номинациялары бойынша бақ сынайды.
Жоба қатысушыларына арнап жауапты министрліктер мен түрлі сала сарапшыларының қатысуымен қазақ тілінде және орыс тілінде 150 кітаптан іріктелді. Аталған кітаптың ішіне «100 кітап» атты Жалпыұлттық сауалнама нәтижесінде таңдалған 43 кітап енгізілген. Олардың ішінде – Абай Құнанбайұлының қара сөздері, Мұхтар Әуезовтың «Абай жолы», Міржақып Дулатовтың «Бақытсыз Жамал» романы және Әбдіжәміл Нүрпейісовтің «Қан мен тер» сынды еңбектерін ерекше атап өтуге болады.
Қатысушылар әр аталым бойынша 15 кітаптан оқуы тиіс. Ерекше айта кетерлігі, «Кітап оқитын мектеп» аталымында 75 кітап бөлінген. Мұның себебі, әр сыныпқа 15 кітаптан қарастырылған.
Байқау жеңімпаздары қомақты қаржылай сыйлықпен марапатталады.
Жобаны «AMANAT» партиясы «Кітап оқитын ұлт – Читающая нация» қоғамдық қорымен бірлесіп жүзеге асыруда.
«Құрметті шымкенттіктер! Кітап – білім мен шабыттың сарқылмас қайнары. Ол көкжиегіңді кеңейтеді, тұлғаңды қалыптастырады, жаңа мүмкіндіктерге жол ашады. Әрқайсыңызды осы игі бастаманы қолдап, белсенді қатысуға шақырамын. Кітапқа деген сүйіспеншілік – бәрімізге ортақ жақсы дәстүрге айналсын!
Барша қатысушыларға сәттілік тілеймін! Байқау шарттары жайлы толық ақпарат қала әкімдігінің ресми сайтында жарияланады», – деп жазды Ғабит Сыздықбеков.