Алматы тауларында туристің жағдайы күрт нашарлап кетті
Құтқарушылар екі сағаттан кейін туристі дәрігерлерге табыстады
Алматы тауларында 4000 метрден жоғары биіктікте туристің жағдайы нашарлап кетті, деп хабарлайды Azattyq Rýhy.
Төтенше жағдайлар министрлігі баспасөз қызметінің мәліметінше Молодёжный шыңындағы лашық маңында еріктілер тобы лагерь құрған.
«Сол жерде топтың бір қатысушысының жағдайы күрт нашарлап, биіктік ауруының белгілері байқалды», - деп жазылған хабарламада.
Туристі төменге түсіру үшін «Тұйық-Су» бақылау-құтқару пунктінің құтқарушылары көмекке жіберілді.
«Екі сағаттан кейін турист ТЖМ Медицина орталығының дәрігерлеріне табысталды. Ер адамның жағдайы қанағаттанарлық деп бағалануда», - дейді құтқарушылар.
Іздеу-құтқару жұмыстары аяқталды, барлық қатысушы аман-есен.
Еске сала кетейік, бұған дейін Алматы тауларында туристер адасып кеткен болатын. Құтқарушылар оларды тауып, таудан Шымбұлаққа дейін аман-есен түсірді.
