Берденов ешқандай шектен шыққан жоқ – Шымкент әкімдігі

Шымкент әкімдігі Руслан Берденовтың қызметтен кетуі мүмкін екенін жоққа шығармайды. Алайда қала әкімінің орынбасары әзірге жұмыcтан шығу туралы өтініш түсірмеген, деп хабарлайды Azattyq Rýhy Otyrar.kz-ке сілтеме жасап.

Шымкент қаласы әкімінің орынбасары Руслан Берденовтің еңбекке жарамсыздық парағы 6 айға дейін сақталады. Бұл туралы бүгін қалалық өңірлік коммуникациялар қызметінде өткен баспасөз мәслихатында қала әкімінің орынбасары әрі ресми өкілі Сәрсен Құранбек хабарлады.

«Руслан Берденовтің жұмыстан кетуі туралы бұйрық әлі шыққан жоқ. Ресми түрде ол кісі еңбекке жарамсыз парағын аштырған. Емделіп жатыр. Әлі күнге әкімдіктің құрамында. Бірақ біздің білуімізше, Руслан Берденов бұдан былай әкімдіктегі жұмысын жоғалтқысы келген болуы керек, ондай болатын болса келіп өтінішін жаза жатар. Әркімнің өз таңдауы, ниеті. Денсаулығымен айналысамын деп шешкен болса керек. Ресми түрде бұйрық шықпайынша біз ол кісіні қала әкімінің орынбасары деп есептейміз», - дейді ол.

Сәрсен Құранбектің сөзінше, кез келген облыс, Алматы, Астана, Шымкент қаласында әкімнің бес орынбасары болады. Бұл заңмен бекітілген. Қазір Шымкентте қала әкімінің үш орынбасары жұмыс істеп жатыр. Қалған екі орынның бірінде – Берденов болса, екіншісі бос тұр.

«Өздеріңіз білесіздер, заң бойынша еңбекке жарамсыздық қағазы болған жағдайда 3 айға дейін орнын сақтап қалуға рұқсат беріледі. 3 айдан кейін дәрігерлердің шешімі бойынша тағы да 3 айға дейін создыруға болады. 6 айдан артық еңбекке жарамсыз парағында болатын болса ғана тиісті шаралар қабылдануы мүмкін. Қазіргі таңда Берденов мырза бұл тұрғыдан ешқандай шектен шыққан жоқ. Заң аясында бәрі де заңды», - деп түсіндірді Шымкент қаласы әкімінің орынбасары.

Бірер күн бұрын Шымкент қаласы әкімінің екі орынбасары тағайындалған. Кей БАҚ оның бірі Берденовтің орнына келгенін жазған еді.

Айта кетері, Берденовтің жарақат алғанына 4 айдан асты. Оны 21 сәуір күні қала әкімдігінің алдында Ернар Жиембай оқ атып жаралаған.  Жиембай 9 жылға түрмеге жабылды.