Жасөспірім оқиғадан кейін қашып кеткені
Алматыда екі жасар сәбиді асфальтқа алып ұрған 13 жастағы жасөспірімнің арнайы есепте тұрғаны анықталды, деп хабарлайды Azattyq Rýhy КТК-ға сілтеме жасап.
Қазір оқиғаға қатысты тергеу жүріп жатыр. Жарақат алған екі жасар бала емделіп жатыр. Бұл туралы Алматы қаласындағы балалар омбудсмені Диана Ерлан мәлімдеді.
«Екі баланың ата-анасымен байланыс орнаттым. Зардап шеккен тарапқа — сәбиге медициналық көмек көрсетілді. Алдағы уақытта оңалтудан өтеді. Қазір бүлдіршін үйінде, ата-анасының жанында. 13 жастағы жасөспірім де ата-анасының қарауында. Алматы қаласындағы Психологиялық қолдау орталығы тараптарға тиісті көмек ұсынды. Аталған дерек бойынша ҚР ҚК 107-бабы 2-бөлігінің 8-тармағы бойынша қылмыстық іс қозғалды», - дейді Диана Ерлан.
Оқиға Алматының Әуезов ауданында болған. 13 жастағы жасөспірім екі жасар баланы асфальтқа лақтырып, бүлдіршіннің бұғанасын сындырған. Бейнежазбаны анасы әлеуметтік желіге жариялады. Кадрдан жасөспірімнің оқиғадан кейін қашып кеткені көрінеді. Кейін оның арнайы есепте тұрғаны анықталды. Баланың анасы сол күні жасөспірімнің ата-анасымен ем-дом шығынын өтеуге келіскенін, алайда кейін райынан қайтқанын жеткізген.