Астанада шетелден автокөлік әкелемін деп жұртты алдаған күдікті ұсталды

Астана полицейлері 34 жастағы қала тұрғынын алаяқтық жасады деген күдікпен ұстады, деп хабарлайды Azattyq Rýhy.

Қалай алдады?

Тергеу дерегінше, күдікті таныстарына «шетелден арзан автокөлік әкеліп, құжаттарын рәсімдеп беремін» деп уәде берген. Алайда ірі көлемде ақша алған соң өз міндетін орындамаған.

Жәбірленушілер оның бұрыннан таныс болуы мен өзін беделді адам ретінде көрсетуіне сеніп қалған.

Қанша шығын келтірді?

Қазіргі таңда күдіктінің алаяқтықтың 5 фактісіне қатысы бар екені анықталды. Жәбірленушілерге келтірілген жалпы шығын көлемі 750 мың теңгеден асты.

Тергеу амалдары

Аталған дерек бойынша ҚР ҚК-нің 190-бабы («Алаяқтық») бойынша сотқа дейінгі тергеу басталды. Күдікті уақытша ұстау изоляторына қамалды.

Полицияның ескертуі

Полиция департаменті азаматтарға алаяқтардан сақ болуды ескертеді:

• ірі соманы тек ресми келісімшартпен беріңіз;
• уәде еткен адамның сенімділігіне көз жеткізбей қаржы аудармаңыз;
• күдік туса бірден полицияға жүгініңіз.