Бозбаланың ата-анасына бірқатар айыппұл салынды
Астанада полиция кәмелетке толмаған бала мас күйде әпкесінің көлігін айдап кеткен, деп хабарлайды Azattyq Rýhy Полиция департаментіне сілтеме жасап.
Hyundai көлігін 17 жастағы жасөспірім жүргізген. Ол жүргізуші куәлігінсіз және алкогольдік масаң күйде ұсталды.
«Кәмелетке толмаған құқықбұзушы мас күйде көлікті жүргізгені үшін әкімшілік жауапкершілікке тартылды. Сондай-ақ, оның заңды өкіліне – жасөспірімнің алкогольдік сусындарды тұтынғаны, түнде ересектерсіз жүргені және ата-аналық міндеттерін орындамағаны үшін әкімшілік жаза қолданылды», – деп хабарлады полиция департаменті.
Көліктің иесі – жасөспірімнің әпкесі де жауапкершіліктен босатылған жоқ, ол көлікті жүргізуші куәлігі жоқ адамға берген.
Полиция ата-аналарды балаларын, әсіресе түнде бақылауда ұстау қажеттігін еске салды, өйткені мұндай жағдайлар тек жасөспірімдер үшін ғана емес, жолдағы басқа қатысушылар үшін де қауіп төндіреді.