Қазақстанда жалға берілетін пәтер бағасы тағы да қымбаттады

Қазақстанда пәтерді жалға алу құны қайтадан өсті. Сарапшылар мұны жаңа оқу жылының басталуымен байланыстырып отыр. Алайда бірнеше айдан кейін сұраныс бәсеңдеуі мүмкін. Бұл туралы Azattyq Rýhy агенттігі «31 арнаға» сілтеме жасап хабарлайды.

Астанада баға рекордтық деңгейде өсуде

Телеарна мәліметінше, Астанада жалға берілетін пәтерлер бір жылда 25-30%-ға қымбаттаған. Қазір елордада бір шаршы метрді жалдау құны – 5 мың теңге. Демек, 50 шаршы метрлік шағын пәтерді жалға алу құны айына 250 мың теңгеден басталады.

Ал мұндай пәтерді бірнеше ай бұрын 130 мың теңгеге табуға болатын еді.

Ең қымбат бағалар сол жағалаудағы элиталық үйлерде байқалады. Мұнда бір бөлмелі пәтерлер айына 600 мың теңгеге дейін жалға беріледі.

Сарапшылардың айтуынша, тамыз айында жалға алу құны күрт көтерілген. Бұған тек студенттердің келуі ғана емес, құрылыс көлемінің азаюы да әсер етіп отыр.

«Астанада қазір құрылыс азайды. Болашақта тұрғын үй бағасы өсе береді, сәйкесінше жалдау ақысы да қымбаттайды. Адамдар елордада тұрғысы келеді», – дейді ҚР Құрылысшылар одағы төрағасының орынбасары Ақан Бақытжан.

Алматыда да баға шарықтап тұр

Жалпы баға өсімі бойынша Астана алда болғанымен, Алматы жалға алу құны жағынан ең қымбат қала болып қала береді.

Қазір қаладағы орташа баға бір шаршы метрге – 5 мың теңгеден жоғары.

Бұл дегеніміз, 40-45 шаршы метрлік бір бөлмелі пәтер айына 220-270 мың теңге тұрады.

Қала шетіндегі үйлерді 170 мың теңгеден жалға алуға болады.

Ал орталықта баға 400 мың теңгеге дейін жетеді.

Krisha.kz сарапшысы Вадим Макаровтың айтуынша:

«Сұраныс тамыздың алғашқы күндерінен басталады және біртіндеп артады. Арзан пәтерлер тез жоғалады, ал нарықта негізінен қымбат нұсқалар қалады. Қолжетімді пәтерлер тапшылығы бағаны өсіріп отыр».

22 тамыздағы жағдай бойынша Алматыдағы пәтер бағасы:

• «Бір бөлмелі пәтерлер» – 20%-ға қымбаттап, 240 мың теңгеден басталады;
• «Екі бөлмелілер» – шамамен 17%-ға өсіп, 300-350 мың теңге;
• «Үш бөлмелілер» – 12,5%-ға қымбаттап, 400-450 мың теңге.

Баға қашан төмендеуі мүмкін?

Сарапшылардың пікірінше, алдағы 2-3 айда жалға алу сұранысы жоғары деңгейде қалады. Кейін ол тұрақталуы немесе аздап төмендеуі мүмкін.

Бұл жағдайға әсер ететін негізгі факторлар:

• Астана мен Алматыда студенттік жатақханалардың дамуы;
• Қалада дағдарыс орталықтарының ашылуы.