Қазақстанда астық жинау науқаны басталды

Қазақстанда тамыздың үшінші онкүндігінде жаппай егін жинау науқаны басталмақ. Осыған орай премьер-министрдің орынбасары – ұлттық экономика министрі Серік Жұманғарин жедел штаб отырысын өткізді, деп хабарлайды Azattyq Rýhy.

23,6 млн гектар егістіктің 16 млн-ы – дәнді және дәнді-бұршақты дақылдар

Бүгінде жаңа өнім жинау жұмысы 12 облыста және Шымкент қаласында жүріп жатыр.

• Жалпы егістік көлемі: 23,6 млн гектар
• Дәнді және дәнді-бұршақты дақылдар: 16 млн гектар

Соңғы мәліметтер бойынша:

• 1,1 млн гектар орылды (6,6%);
• 1,6 млн тонна астық бастырылды.

Сонымен қатар, 17,4 мың тонна майлы дақыл, 363,5 мың тонна картоп, 1,3 млн тонна көкөніс және 1,6 млн тонна бақша өнімі жиналды.

Тыңайтқыш енгізу жоспарының 88%-ы орындалды

Ауыл шаруашылығы тауар өндірушілері топыраққа 1,7 млн тонна тыңайтқыш қосты. Бұл – жылдық жоспардың 88%-ы. Қалған көлем күзгі жырту кезінде енгізіледі.

Техника толық дайын

Ауыл шаруашылығы вице-министрі Азат Сұлтанов техниканың дайындық деңгейі 93% екенін хабарлады. Жаппай жинау кезеңінде бұл көрсеткіш 100%-ға жетеді. Астық жинауға мынадай техникалар жұмылдырылады

• 139 мың трактор;
• 31 мың комбайн;
• 17 мың шапқыш;
• 130 мың басқа да техника.

Шаруаларға арзандатылған жанармай жеткізілуде

Егін жинау жұмысына 402 мың тонна арзандатылған дизель бөлінді. Оның 42%-ы (9,3 мың тонна) жеткізілді. Бағасы нарықтан 18-20%-ға арзан.

Элеваторларда орын босату – басты назарда

Қазіргі таңда элеваторлардың жүктемесі – 16%. «Азық-түлік келісімшарт корпорациясы» тамыз соңына дейін кемінде 500 мың тонна астық өткізуді жоспарлауда. Қазірдің өзінде 328 мың тонна сатылды.

Таиланд, Парсы шығанағы елдері, Ауғанстан, Әзербайжан және Алжир елдеріне астық экспорттау туралы келіссөздер жүргізілуде.

Шаруаларға 490 млрд теңге жеңілдетілген несие берілді

Көктемгі дала және жиын-терім жұмысына 5%-дық жеңілдетілген несие қарастырылған.

• 7 543 өтінім түсіп, 499,4 млрд теңге сұралды;
• 7 485 шаруашылыққа 490,1 млрд теңге берілді;
• 7,8 млн гектар егістік қамтылды.

Суармалы су жеткілікті

Алматы және Жетісу облыстарында вегетациялық кезең қауіпсіз өтуде. Жамбыл облысында суару жұмысы кестеге сай жүргізіліп жатыр.

Штаб отырыстары апта сайын өтеді

Вице-премьер өңірлердің жағдайын тыңдап, егін жинау кезінде туындайтын мәселелер апта сайын шешілетінін айтты.