Абай облысында шенеуніктер 1,4 млрд теңгені талан-таражға салмақ болды

Аягөз ауданының прокуратурасы мемлекеттік сатып алудағы заңбұзушылықты анықтап, 1,4 млрд теңгеден астам қаражаттың тиімсіз жұмсалуына тосқауыл қойды, деп хабарлайды Azattyq Rýhy.

Жарияланбаған төтенше жағдай – заңсыз келісімшарт

2025 жылғы 30 мамырда аудандық тұрғын үй-коммуналдық шаруашылық (ТКШ) бөлімі «МИТ Теплосервис» ЖШС-мен «Орталық» қазандығын күрделі жөндеуден өткізу бойынша 1 млрд теңгеден астам сомаға шарт жасаған.
Бұл мемлекеттік сатып алу төтенше жағдайдың салдарын алдын алу деген негізбен бір көзден алу тәсілімен рәсімделген.

Алайда 2025 жылы Аягөз ауданында ешқандай төтенше жағдай жарияланбаған, сондықтан мұндай тәсілді қолдануға заңды негіз болмаған.

Бұған дейін де ұқсас шарт жасалған

Тексеру барысында 2023 жылдың 10 қарашасында дәл осы бөлім жаңа қазандық орнату үшін 110 млн теңгеге шарт жасағаны белгілі болды. Ол шарт үш жылдық кепілдік мерзімімен рәсімделген, яғни алдыңғы жоба қайталануы мүмкін.

Прокуратура заңсыз келісімді жойып, жауаптыны жазалады

Аудан прокуратурасының қадағалау актісі нәтижесінде:

• Заңсыз жасалған келісімшарттың күші жойылды;
• ТКШ бөлімінің басшысы Әкімшілік құқықбұзушылық туралы кодекстің 207-бабы (мемлекеттік сатып алу заңнамасын бұзу) бойынша әкімшілік жауапкершілікке тартылып,
• 200 айлық есептік көрсеткіш (АЕК) көлемінде айыппұл төлеуге міндеттелді.