2025-2026 оқу жылына мемлекеттік білім гранттары иегерлерінің тізімі жарияланды
Ғылым және жоғары білім министрлігі 2025-2026 оқу жылына арналған мемлекеттік білім беру гранттарының иегерлерін жариялады. Президент Қасым-Жомарт Тоқаевтың тапсырмасына сәйкес, гранттардың 60%-ы инженерлік және техникалық бағыттарға бөлінді, деп хабарлайды Azattyq Rýhy.
Биыл «Серпін» бағдарламасына қатысуға өтініш білдіргендер саны артқан. Нәтижесінде, 2 мыңнан астам түлек Қазақстанның солтүстік, шығыс және орталық өңірлеріндегі үздік ЖОО-ларда білім алу мүмкіндігіне ие болды.
«AMANAT» партиясының Сайлауалды бағдарламасын жүзеге асыру аясында биыл 77 мыңнан астам мемлекеттік грант бөлінді. Сонымен қатар, 113 мыңға жуық талапкер конкурсқа қатысты, бұл көрсеткіш өткен жылмен салыстырғанда 9 мыңға көп.
Гранттарды бөлу барысында заңнамада көрсетілген квоталар сақталып отыр. Бұл – әлеуметтік осал топтағы балалардың жоғары білімге қолжетімділігін арттыруға бағытталған нақты қадам.
Халықаралық деңгейдегі олимпиада мен спорт жарыстарының жеңімпаздарына конкурссыз грант тағайындалады. Бұл – дарынды жастарды ынталандыру мен қолдау тетіктерінің бірі.
Биылдан бастап президент тапсырмасымен «Келешек» бірыңғай ерікті жинақтау жүйесі іске қосылды. Ол бойынша 5 жасар балаға шот ашылғанда мемлекет бастапқы капитал құяды, әрі қосымша сыйақы мен банктердің үстемақысы төленеді. Бұл жүйе «Ұлттық қор – балаларға» жобасымен біріктіріле алады.
2024 жылы алғаш рет енгізілген сараланған гранттар жүйесі 2025 жылы 300 грантпен жалғасады. Бұл гранттар оқу ақысының бір бөлігін жабады, ал қалғанын студент өз қаражаты есебінен немесе жеңілдетілген оқу несиесі арқылы төлей алады. Сараланған гранттар бойынша конкурс қыркүйекте өтеді.
Мемлекет алғаш рет мерзімді әскери қызметін өтеп жатқан азаматтарға 2 010 грант бөлді. Бұл бастама – әскери борышын өтеген жастарға жоғары білім алуға тең мүмкіндік беру және қоғамға бейімделуін қолдау мақсатында жүзеге асырылды.
Айта кетейік, ЖОО грантын жеңіп алғандар тізімін мына сілтеме арқылы көруге болады.