Интернет-платформалар табыс туралы деректерді салық органдарына беруге міндеттеледі
Қаржы министрлігі интернет-платформаларға пайдаланушылардың деректерін салық органдарына тапсыруды міндеттейтін бұйрық жобасын әзірледі, деп хабарлайды Azattyq Rýhy «Ашық НҚА» порталына сілтеме жасап.
Құжат Мемлекеттік кірістер комитеті тарапынан Салық кодексінің 14-бабын іске асыру аясында дайындалған. Жаңа есептілік тәртібі жеке тұлғалардың, оның ішінде өзін-өзі жұмыспен қамтығандар мен жеке кәсіпкерлердің цифрлық алаңдар арқылы тапқан табысын, егер олар төлемді тікелей тапсырыс берушіден алса, ашық әрі толық тіркеуді көздейді.
Министрлік өкілдерінің айтуынша, жобаның басты мақсаты – жеке тұлғалар, соның ішінде өзін-өзі жұмыспен қамтығандар табысының толықтығы мен ашықтығын қамтамасыз ету, сондай-ақ интернет-платформаларда жұмыс істейтіндер үшін салық және әлеуметтік төлемдер бойынша міндеттемелерді орындау тәртібін жеңілдету.
Жобаға сәйкес, егер платформада тіркелген қолданушы көрсетілетін қызмет немесе орындалатын жұмыс үшін төлемді платформаның ішкі жүйесі арқылы емес, тікелей алса, онда оператор бұл деректерді Мемлекеттік кірістер органдарына тапсыруға міндетті болады.
Министрлік жобаның нәтижесінде бейресми жұмыспен қамтудың төмендейтінін, салық тәртібінің жақсарып, адал бәсекенің дамитынын атап өтті.
Сондай-ақ бастама азаматтардың өзін-өзі жұмыспен қамтуға қатысты құқықтық мәдениетін арттыруға және өз мүдделерін қорғауға бағытталған.
Бұйрық жобасы ашық түрде талқыланып жатыр. Құжат қабылданғанға дейін барлық мүдделі тарап өз ұсыныс-пікірлерін жолдай алады.