8 ел жоспарға сай өндіру көлемін ұлғайтады
Өз еркімен мұнай өндіруді қысқартқан сегіз ел – Сауд Арабиясы, Ресей, Ирак, БАӘ, Кувейт, Қазақстан, Алжир және Оман қыркүйек айында өндірісті 547 мың баррельге арттыру туралы шешім қабылдады. Бұл қадам бұрын бекітілген төрт айлық жоспардың бір бөлігі болып саналады, деп хабарлайды Azattyq Rýhy.
2024 жылғы 5 желтоқсанда қабылданған келісімге сәйкес, 2025 жылдың 1 сәуірінен бастап ОПЕК+ альянсы тәулігіне 2,2 млн баррельді біртіндеп қалпына келтіруді бастаған. Қыркүйектегі ұлғайту – осы жоспарлы қадамдардың жалғасы.
Аталмыш елдер нарықтық жағдай өзгерсе, өндірісті ұлғайту процесін тоқтатуға немесе қайта қысқартуға дайын екенін мәлімдеді. Бұл шешім мұнай нарығындағы тұрақтылық пен тепе-теңдікті сақтау мақсатында қабылданған.
ОПЕК+ елдері 2024 жылдың қаңтарынан бастап болған артық өндіріс көлемін толық өтеуге уәде берді. Бұл жұмысты Бақылау жөніндегі бірлескен министрлік комитеті (JMMC) қадағалайды.
Альянс мұнай нарығындағы жағдайды ай сайын талқылап отыруды жалғастырады. Келесі онлайн кездесу 2025 жылғы 7 қыркүйекте өтеді деп жоспарланып отыр.