Найзағай кезіндегі қауіпсіздік: ТЖМ қазақстандықтарға ескерту жасады

Синоптиктер алдағы күндері еліміздің бірқатар өңірінде найзағай, бұршақ және екпінді жел болуы мүмкін екенін ескертті. Осыған байланысты ҚР Төтенше жағдайлар министрлігіқазақстандықтарға қауіпсіздік ережелерін қатаң сақтау қажеттігін еске салады, деп хабарлайды Azattyq Rýhy. 

Үй жағдайында қауіпсіздік қалай сақталады?

Найзағай кезінде үй ішінде мыналарды жасау маңызды:

• Барлық терезе мен есікті мықтап жабыңыз;
• Электр құралдарын желіден ажыратыңыз;
• Розетка мен антеннадан қашықта болыңыз.

Көшеде жүрген кезде не істеу керек?

Егер сіз найзағай кезінде сыртта жүрген болсаңыз, келесі кеңестерді ұстаныңыз:

• Ғимарат ішіне немесе көлікке кіріп паналаңыз;
• Ағаштың немесе металл шатырлардың астында тұруға болмайды;
• Мотоцикл немесе велосипедтен түсіңіз;
• Қолшатыр қолданбаңыз;
• Мобильді телефонды сөмкеге салып қойыңыз;
• Металл әшекейлер мен аксессуарлардан бас тартыңыз.

Табиғат аясында қауіпсіздікті қалай қамтамасыз етуге болады?

Ашық далада немесе орманда жүргенде:

• Жалғыз тұрған биік ағаштардың астына жасырынбаңыз;
• Жердің төмен тұсына – шұңқыр не ойпаң жерге тығыныңыз;
• Өзен, көл сынды су айдындарынан аулақ болыңыз.

Төтенше жағдайлардың алдын алу

«Найзағай кезінде адам өмірі қауіп-қатерге тап болуы мүмкін. Сондықтан әр азамат өзін және жақындарын қорғау үшін қарапайым қауіпсіздік ережелерін білуі және орындауы керек», – делінген ҚР ТЖМ мәлімдемесінде.

Найзағай неге қауіпті?

Найзағай – табиғи құбылыс болғанымен, адам өміріне тікелей қауіп төндіреді. Әсіресе, ашық кеңістікте, су маңында немесе металл заттардың жанында болғанда, оның салдары ауыр болуы мүмкін. Қазақстанда жыл сайын жүздеген найзағай тіркеледі және оның салдарынан адам шығыны мен материалдық зиян да болады.