Алматы облысында жоғалған тікұшаққа қатысты тың мәлімет жарияланды

Сорбұлақ су қоймасы аумағында 2025 жылдың 25 шілдесінде жоғалып кеткен әуе қорғанысы күштері EC-145 тікұшағының бортында болғандардың қай жерде екенін анықтау бойынша ауқымды іздестіру құтқару операциясы жалғасып жатыр, деп хабарлайды Azattyq Rýhy.

Іздеу жұмыстары жалғасып жатыр

Жұмыстар күшейтілген режимде және тәулік бойы жүргізіліп жатыр.

«Операцияға 400-ге жуық адам, 70-тен астам жер үсті техникасы, 21 жүзу құралы, 10 ҰҰА, эхолоттар, су асты сканерлеу құралдары, сондай-ақ кинологиялық есептоптар тартылды», - деп хабарлады Қорғаныс министрлігінің баспасөз қызметі.

Жергілікті жерде құтқару операциясына Қазақстан Республикасы Қарулы Күштері Әскери-әуе күштерінің қолбасшысы авиация генерал-майоры Асқар Ізбасов басшылық жасап жатыр. Ол барлық тартылған бөлімшенің іс-әрекетін үйлестіреді. 

Күш-құралдардың құрамы

Қорғаныс министрлігінен:

• 193 әскери қызметші,
• 4 ұшқышсыз ұшу аппараты,
• 25 бірлік техника, 8 жүзу құралы.

Төтенше жағдайлар министрлігінен:

• 87 адам,
• 22 бірлік техника,
• 10 жүзу құралы,
• 7 ҰҰА, 2 эхолот,
• сүңгуірлер,
•  2 кинологиялық есептоп.

Ішкі істер министрлігінен:

• 102 қызметкер,
• 30 бірлік техника.

Әкімдіктен:

• 2 автомобиль,
• 3 жүзу құралы.

Жету қиын және терең учаскелермен қоса акватория мен жағалау аймағын кешенді зерттеу жүргізіліп жатыр. Іздеу шаралары күндіз де, түнде де тоқтамайды.

Жоғалған адамдардың туыстарымен ұдайы байланыс ұйымдастырылды. Оларға операцияның барысы туралы уақтылы хабарланады.

Іздеу жұмыстары қиындады

Сорбұлақ –  ірі жасанды көлдердің бірі, Алматы облысының солтүстік-батысындағы табиғи тұйық ойпатта орналасқан қалдық су жиыны. Іздеу жұмыстары бірқатар факторға байланысты күрделене түскен:

• күрделі су асты рельефі және түбі шөгінді;
• айнымалы тереңдік (22 метрге дейін);
• су алмасу баяу;
• су мөлдір емес, лай әрі балшық.

Бұл табиғи және техногендік ерекшеліктер операцияға қатысушылардың бәрінен барынша дәлдікті, техникалық жабдықталуын және іс-әрекеттерінің үйлесімділігін талап етеді.

Іздестіру құтқару іс-шаралары түпкілікті нәтижелер алынғанға дейін жалғасады. Барысы мен қорытындылары туралы қосымша хабарланады.

Бұған дейін хабарланғандай, EC-145 әскери тікұшағы жоспарлы ұшу кезінде радардан жоғалып кеткен. Әуе кемесінің бортында үш экипаж мүшесі болған.