Істе 51 жәбірленуші бар, ал іс құжаттарының көлемі 100 томнан асады
Сот Перизат Қайраттың дүние-мүлкін тәркілей отырып, 10 жылға, анасы 7 жылға бас бостандығынан айырды. Бұл үкім соттағы негізгі тыңдау аяқталғаннан кейін шығарылды, деп хабарлайды Azattyq Rýhy.
Соттағы жарыссөздер барысында прокурорлар айыпталушы үш эпизод бойынша да кінәсін мойындамағанын әрі жасаған ісіне өкінбегенін атап өтті.
Негізгі сот процесі 14 шілдеде басталған. Істе 51 жәбірленуші бар, ал іс құжаттарының көлемі 100 томнан асады.
Айта кетейік, Перизат Қайрат 2024 жылдың қарашасында қазақстандықтардың қайырымдылыққа деп жинаған 3 млрд теңгеден астам қаражатын өз қажетіне жұмсап, талан-таражға салғаны үшін ұсталған.
Бұл қаражат мүмкіндігі шектеулі балаларға, Қазақстандағы су тасқынынан және Таяу Шығыстағы қақтығыстан зардап шеккендерге қайырымдылық көмегі ретінде жиналған. Қылмыстық іс сотқа жолданды. 9 шілдеде Астана сотында ұрланған қаражаттың жалпы сомасы нақтыланып, 3,5 миллиард теңгені құрағаны айтылды.
Қылмыстық іс бойынша сот процесі екі аптаға созылды. Ол ішінара жабық режимде өтті. Сотта дәлелдер журналистердің қатысуынсыз зерттелді.
Сот Перизат Қайраттың мүлкі мен жылжымайтын мүлкіне тыйым салды. Әңгіме элиталық жылжымайтын мүлік, люкс автокөліктер, қымбат әшекей бұйымдар мен аксессуарлар туралы болып отыр.
2025 жылдың қаңтар айының соңында ҚР Қаржылық мониторинг агенттігі Перизат Қайратқа қатысты жаңа тергеуді тіркеді. Ол мүмкіндігі шектеулі балаларға арналған оңалту орталығын салу үшін ақша жинау кезінде алаяқтық жасады деп айыпталды.
Күдікті өзін бизнес-ханым ретінде көрсетуге тырысып, заңсыз иемденген миллиардтарды заңдастырмақ болған. Ол тергеу органдарымен байланыс орнатудан бас тартып, жауап беруден де бас тартқан.