Қаза тапқандардың бәрі – Тайланд азаматтары
Тайланд пен Камбоджа арасындағы шекарада 24 шілде күні әскери қақтығыстар басталды, деп хабарлайды Azattyq Rýhy агенттігі Euronews-ке сілтеме жасап.
Бангкок Камбоджаны артиллериялық шабуыл жасады деп айыптаса, Пномпень өз кезегінде Тайланд әуе соққыларын мойындаған. Екі тарап та бейбіт нысандарға оқ атылғанын айтуда.
Бангкок мәліметінше, қаза тапқандардың барлығы Тайланд азаматы, оның ішінде 11 адам – бейбіт тұрғын.
Камбоджа қаза болған азаматтары туралы әзірге ақпарат таратқан жоқ.
Камбоджа үкіметінің баспасөз хатшысы Пен Бона мәлімдемесінде Тайландты кінәлады:
«Бүгін болған барлық жағдайға Тайланд кінәлі. Құрметті бауырлар, әпке-қарындастар және халықаралық қауымдастық, Тайланд бізге оқ атты – олардың көздегені біздің жеріміз», – деді ол.
Тайландтың уақытша премьер-министрі Пхумтам Вечайчай мәлімдеме жасады:
«Біз өз еліміздің тәуелсіздігін және шекарасын қорғаймыз. Мәселенің түп-төркіні – осы. Біздің егемендігімізге қол сұғуға жол бере алмаймыз. Сондықтан елдің қорғанысы үшін барлық міндетімізді орындауға дайынбыз», – деді ол.
Тайланд пен Камбоджа арасындағы шекаралық дау Француз Үндіқытайы дәуірінен, яғни бір ғасырға жуық уақыттан бері жалғасып келеді. Осы уақыт ішінде шекарада бірнеше мәрте қақтығыс тіркелген. Соңғысы – 2025 жылдың мамыр айында даулы аумақта камбоджалық сарбаз қаза тапқан оқиға.