Қаскелең тұрғыны жалған уәде беріп, ондаған азаматты алдаған
Алматы облысында өзін әкімдіктің қызметкері ретінде таныстырған 47 жастағы Қаскелең қаласының тұрғыны ірі көлемде алаяқтық жасағаны үшін сотталды, деп хабарлайды Azattyq Rýhy.
Тергеу барысында күдіктінің әлеуметтік жағынан аз қамтылған отбасыларға арналған мемлекеттік ипотекалық бағдарлама бойынша тұрғын үй рәсімдеуге көмектесемін деп сендіргені анықталған. Ол пәтерді төмен пайызбен, небары екі-үш айдың ішінде алып бере алатынын айтып, сенімге кірген.
Нәтижесінде 47 азамат күдіктіге жалпы көлемі 110 миллион теңге қаражат берген.
Тексеру барысында ер адамның жоғары білімі болғанымен, ресми түрде еш жерде жұмыс істемегені белгілі болды.
Келісілген мерзім ішінде тұрғын үй берілмегенін байқаған жәбірленушілер полицияға жүгінген.
Құқық қорғау органдары тергеу барысында жеткілікті дәлелдер жинап, күдіктінің кінәсі толық дәлелденді. Сот шешімімен ер адам 4 жыл 8 ай мерзімге бас бостандығынан айырылды.
Сондай-ақ ол 75 миллион теңгені жәбірленушілерге қайтаруға және сот шығындарын өтеуге міндеттелді.