Алматыға Қытайдан контрабандалық тауар тасымалдаған компания елге 10 млрд теңге залал келтірді

Алматы қаласында Қытайдан Қазақстанға халық тұтынатын тауарларды заңсыз кіргізу және аса ірі мөлшерде жалған шот-фактуралар жазу дерегі бойынша қылмыстық іске қатысты сот үкімі шықты, деп хабарлайды Azattyq Rýhy.

Аталған істі Қаржылық мониторинг агенттігінің Алматы қаласы бойынша департаменті тергеген.

100-ден астам контейнер заңсыз кіргізілген

Тергеу нәтижесінде «Group of the Companies TDA» ЖШС-і уәкілетті экономикалық оператор мәртебесіне ие бола тұра, Қытайдан 100-ден астам контейнерді елімізге контрабандалық жолмен жеткізгені анықталған.

Жалған шот-фактуралар және 10 млрд теңге залал

Компания басшылығы өз бақылауындағы 10 ЖШС арқылы жалған шот-фактуралар рәсімдеген. Бұл әрекеттердің нәтижесінде мемлекетке 10 миллиард теңге көлемінде (ҚҚС, корпоративтік табыс салығы және кедендік төлемдер бойынша) шығын келтірілген.

Алғашқы залалдың бір бөлігі өтелді

Сотқа дейінгі тергеу кезінде мемлекет бюджетіне 643 миллион теңге өндіріп алынды. Сонымен қатар, сот санкциясымен жалпы құны 1,3 миллиард теңге болатын тауарлар мен 300 миллион теңге көлеміндегі мүлікке (жер телімдері, автокөліктер, багги көліктері, шатырлар және т.б.) тыйым салынды.

47 серіктес компания өз еркімен салық төледі

Іске байланысы бар 47 серіктес кәсіпорын өзара есеп айырысуды тоқтатып, бюджетке 240 миллион теңге көлемінде салық төлеген.

Сот үкімі: бас бостандығынан айыру және мүлікті тәркілеу

Алмалы аудандық сотының үкімімен кінәлі тұлғалар 1 жыл 4 айдан бастап 4 жыл 6 айға дейінгі мерзімге бас бостандығынан айырылды. Сонымен қатар, олардың мүлкі тәркіленді.

Бір күдікті халықаралық іздеуде

Іске қатысы бар тағы бір адамға халықаралық іздеу жарияланғаны хабарланды.