Әскери қызметшілер суға батып бара жатқан адамды құтқарып қалды
Есіл өзенінде қайғылы жағдайдың алды алынды. Құтқару операциясы ТЖМ рейдтік іс-шарасы аясында жүргізілді, деп хабарлайды Azattyq Rýhy.
Бүгін Есіл өзенінде тұрғындардың қауіпсіздігін қамтамасыз ету мақсатында жүргізілген рейд барысында Мартбек Мамраев атындағы №52859 әскери бөлімінің сарбаздары – сержант Владислав Ярилин мен кіші сержант Қасымхан Қошқар – шомылуға тыйым салынған орында суға батып бара жатқан ер адамды байқап қалды.
Әскери қызметшілердің жылдам әрі үйлесімді әрекетінің арқасында 1992 жылы туған азамат судан аман-есен шығарылып, жағаға жеткізілді. Абырой болғанда, оған медициналық көмек қажет болған жоқ.
Төтенше жағдайлар министрлігі тұрғындарға кезекті рет ескерту жасады:
«Тыйым салынған орындарда шомылу – өз өміріңізді қауіпке тігу деген сөз. Өзіңізге және жақындарыңызға жауапкершілікпен қараңыз».