Іле Алатауында жарақат алған ресейлік турист тікұшақпен эвакуацияланды

Іле Алатауы жоталарында жарақат алған туристке Төтенше жағдайлар министрлігінің құтқарушылары жедел көмек көрсетті. Туристер тобы Есік өзенінің жоғарғы ағысында, теңіз деңгейінен шамамен 3500 метр биіктікте жүрген, деп хабарлайды Azattyq Rýhy.

Ресейлік турист аяғын шығарып алған

Құтқарушыларға жолданған ақпаратқа сәйкес, Ресейден келген сегіз адамның бірі – 1991 жылы туған ер адам қозғалыс кезінде аяғын ауыртып алған. Алдын ала болжам бойынша, аяғын шығарып алған. Жағдайы орташа ауыр деп бағаланды.

Эвакуацияға тікұшақ жұмылдырылды

Құтқару жұмыстарына ТЖМ Республикалық жедел-құтқару жасағының (РЖҚЖ) мамандары, ТЖМ Авиациялық-медициналық отрядының (АМО) дәрігерлері жұмылдырылды.

Олар Боралдай кентіне аттанып, «Қазавиақұтқару» АҚ-ның Ми-171 тікұшағы Боралдай әуежайынан ұшып шықты.

Турист сәтті құтқарылып, дәрігерлерге тапсырылды

Тікұшақ қиын қолжетімді тау аймағынан зардап шеккен азаматты шұғыл эвакуациялап, Боралдай әуежайына қонды. Онда жарақат алған турист медицина қызметкерлеріне тапсырылды.

Топтың қалған мүшелері эвакуациядан бас тартты, жорықтарын жалғастыруда.

Құтқару операциясы үйлесімді өтті

ТЖМ мәліметінше, табиғи жағдайлардың күрделілігі мен оқиға орнының алыс болуына қарамастан, барлық қызметтердің үйлесімді жұмысы арқасында операция сәтті аяқталды.

Егер құтқарушылар жаяу жетуге мәжбүр болғанда, бұл жол екі тәуліктен астам уақыт алар еді.