«Шымкент жастар театрының» директорына 136 млн теңге жымқырды деген айып тағылды

Шымкент қаласы бойынша Қаржылық мониторинг агенттігінің департаменті «Шымкент жастар театры» МКҚК директоры мен басқа да лауазымды тұлғаларға қатысты 136 миллион теңгеден астам бюджет қаржысын жымқыру фактісі бойынша тергеуді аяқтады, деп хабарлайды Azattyq Rýhy.

Мемлекеттік бюджеттен концерт ұйымдастыруға қажет жабдықтарды – колонкалар, сабвуферлер, сахналық фермалар, күшейткіштер мен микрофондар сатып алуға 320 миллион теңге бөлінген.

Сатып алуда айла-шарғы жасалған

Тергеу деректеріне сәйкес, күдіктілер:

• Сатып алу талаптарын бұзған;
• Лоттарды қолдан бөлшектеп, 20-дан астам атау бойынша сатып алуды электронды дүкен арқылы жасаған;
• Жалған жеке кәсіпкерлермен келісімшарт жасасып, нақты жеткізілмеген жабдық үшін ақша аударған;
• Алынған қаражатты қолма-қол ақшаға айналдырған.

Жымқырылған қаржыға пәтер мен көлік сатып алған

Күдіктілердің бірі қылмыстық жолмен алынған табысты жасыру мақсатында жалпы құны 48 миллион теңге болатын автокөлік пен пәтер сатып алған. Аталған мүлікті сенімді адамдардың атына рәсімдеген

Сот шешімімен бұл мүлікке тыйым салынды.

Күдіктілер қамауға алынды

Қазіргі таңда күдіктілер қамауға алынған, іс бойынша сотқа дейінгі тергеу аяқталды. Қаржылық теріс қылық жасағандар заң алдында жауап береді.