Бұл ауылдарда ішімдік те, темекі де сатылмайды
Ақмола облысының ауылдарында қылмыс деңгейі күрт төмендеді. Аймақтағы 35 ауыл ішімдік сатудан түбегейлі бас тартты, деп хабарлайды Azattyq Rýhy агенттігі 24.kz-ке сілтеме жасап.
Мысал ретінде Сандықтау ауданына қарасты Қызылжар ауылын келтіруге болады. Мұнда тұрғындар 2006 жылдан бастап алкоголь сатудан ерікті түрде бас тартқан. Содан бері ауылда қылмыс тіркелмеген.
«Бүгінге дейін бізде ешқандай қылмыс болған жоқ. Жастар тәртіпке бағынып, үлкендердің сөзіне құлақ асады. Учаскелік полицей кез келген уақытта ақсақалдарға жүгіне алады. Біз мәселені бірге шешеміз», – дейді ауыл тұрғыны.
Учаскелік инспектор Асылбек Есмағамбетов атап өткендей, ақсақалдар кеңесінің көмегі зор:
«Олар өз бетімен маңызды мәселелерді шешеді, құқық бұзушылықтың алдын алады, жастарға тәрбие береді, спортқа баулиды. Ауылдық округте ішімдік пен темекі өнімдері мүлде сатылмайды, бұл өз кезегінде қылмыс қаупін едәуір азайтты», - дейді.
Екі жыл бұрын облыста «Зиялы қауым» пилоттық жобасы іске қосылған болатын. Бұл кімдер жұмылдырылды:
Бүгінде жоба 140 ауылда жүзеге асуда.
«Бұл елді мекендерде бірде-бір қылмыс тіркелмеген. Жалпы алғанда, ауылдық жерлерде қылмыс көрсеткіші төмендеді», – деді Ақмола облыстық полиция департаменті басшысының орынбасары Серік Әбутәліпов.
Облыс прокуроры Руфат Құттықов бұл тәсілді «тірі профилактика» деп атады:
«Жергілікті билік пен полицияның тұрғындармен тығыз жұмыс жүргізуі, отбасылық жанжалдарды дер кезінде шешуі – ауылдағы қауіпсіздік пен өмір сапасына оң әсерін тигізіп отыр».
Қауіпсіздікті күшейту үшін ауыл шаруашылығы кәсіпорындары 18 ауылда 1250 бейнекамера орнатты. Соңғы екі жылда 98 ауылда мүлде қылмыс тіркелмеген, деп мәлімдеді полиция өкілдері.