Жаңа туған шақалақтың жағдайы ауыр, жансақтау бөлімінде жатыр
Қарағанды қаласында әйел адам автобус аялдамасында толғағы ұстап, сәбиін сол жерде дүниеге әкелді. Бұл туралы Azattyq Rýhy агенттігі ekaraganda.kz сайтына сілтеме жасап хабарлайды.
Оқиға «ТБЦ» аялдамасында болған. Куәгерлердің айтуынша, жедел жәрдем қызметі шұғыл келіп, тиісті медициналық көмек көрсеткен.
Облыстық денсаулық сақтау басқармасы бұл ақпаратты растап отыр.
«Көрсетілген көмектен кейін анасы мен нәресте облыстық клиникалық ауруханадағы перинаталдық орталыққа жеткізілді», – деп мәлімдеді ведомстводан.
Дәрігерлердің айтуынша, анасының жағдайы – тұрақты. Дегенмен, жаңа туған сәби – жансақтау бөлімінде, жағдайы ауыр деп бағаланып отыр.