Ол мефедронның аналогын сатып алып, түрлі мекенжайларға жеткізген
Түркістан облысының қылмыстық істер жөніндегі мамандандырылған ауданаралық соты Түлкібас ауданының 17 жастағы тұрғынын психотроптық заттарды аса ірі көлемде өткізгені үшін 7 жылға бас бостандығынан айыру туралы үкім шығарды, деп хабарлайды Azattyq Rýhy.
Тергеу барысында жасөспірім Мыңбай ауылында тұрып, Telegram арналар арқылы есірткі бизнесін ұйымдастырушылармен байланыс орнатып, бірнеше ай бойы Шымкент және Сарыағаш қалаларында есірткі курьері ретінде жұмыс істегені анықталды.
Қылмыстық схема бойынша жасөспірім меткатион (мефедронның аналогы) есірткісін сатып алып, оны буып-түю, орау материалдарын сатып алу, түрлі мекенжайларға жеткізу және арнайы шифрланған байланыс арналары арқылы есеп беру сияқты әрекеттермен айналысқан. Төлемдер криптовалюта арқылы жүзеге асырылып, кейін P2P-сервистер арқылы теңгеге ауыстырылған.
Күдіктіден 29 орам есірткі және тағы 26 орамда 41 «қалта» табылып, жалпы салмағы 136 грамнан асады. Бұл заттар тәркіленіп, қылмыстық іс бойынша тергеу жүргізілді.
Прокуратура өкілдері ескертеді: аса ірі көлемде және қоғамдық орында жасалған есірткі саудасы – ауыр қылмыс және ол қатаң жазаға әкеп соғады.