Астана тұрғыны соттасып жүріп, өзінің ұлты неміс екенін дәлелдеді

Астана тұрғыны сот арқылы өзінің ұлты белорус емес неміс екенін дәлелдеп шықты, деп хабарлайды Azattyq Rýhy.

Елорда тұрғыны ІІМ Көші-қон қызметіне ұлтын белорус деп көрсетілген құжаттарын неміс деп өзгерту туралы өтінішпен жүгінген. Өтінішінде ол атасының туу туралы куәлігін ұсынған. Онда арғы атасы мен әжесінің де неміс ұлтынан екені көрсетілген.

Алайда ведомство Қазақстан Республикасының «Неке (ерлі-зайыптылық) және отбасы туралы» кодексінің 65-бабына сілтеме жасап, азаматтың талабын қанағаттандырудан жазбаша бас тартқан. Кодекске сәйкес, адамның ұлты ата-анасының ұлтына қарай анықталады және тек олардың біреуінің ұлтына ғана өзгертілуі мүмкін.

Сот ведомствоның шешімін заңсыз деп таныды

Астана қаласының Мамандандырылған ауданаралық әкімшілік соты (МАӘС) көші-қон қызметінің әрекетін заңсыз деп танып, бұл шешім Конституция мен отбасылық заңнама нормаларына қайшы екенін атап өтті.

Сот азаматтың тарихи негіздерге сүйене отырып, ұлтын өзгертуге толық конституциялық құқығы бар екенін мәлімдеді.

Конституциялық сот маңызды қаулы қабылдады

2025 жылғы 16 сәуірде Конституциялық Сот «Неке және отбасы туралы» кодекстің 65-бабындағы нормаларды Конституцияға қайшы деп таныды. Атап айтқанда, бұл баптың тек ата-анасының ұлтымен шектеліп, өзге дәлелдер мен өмірлік мән-жайларды ескермейтін тұстары сынға ұшырады.

Сот шешімінде былай делінген: «Ұлтты анықтау – адамның өзін-өзі сәйкестендіруі, бұл тек шығу тегіне ғана емес, сондай-ақ мәдени, әлеуметтік байланыстарға негізделуі мүмкін. Ұлт – адамның ішкі еркіндігін білдіреді және құқықтық мәнге ие.

Жаңа құқықтық ұстаным: тек ата-анасы емес, басқа туыстар да есепке алынады

Конституциялық сот өз шешімінде енді ұлтын өзгерту кезінде ата-анасынан бөлек, мынадай дәлелдер мен тұлғалар да ескерілуі мүмкін екенін көрсетті:

• Жақын туыстарының ұлты;
• Балалық шағында тәрбиелеген тұлғалар;
• Объективті және сенімді тарихи деректер.

Азаматтың неміс этносына тиесілігі дәлелденді

Талап қоюшының жақын туыстары саяси қуғын-сүргінге ұшырап, ұлтын өзгертуге мәжбүр болған. Ол бүгінгі таңда неміс этномәдени бірлестіктерінің жұмысына белсенді қатысады, ұлт мәдениетін сақтау мен таратуға атсалысады.

Сот оның этникалық тамырларымен байланысы, мәдени сәйкестігі және ұлтты дербес таңдау құқығын нақты ескеріп, арызды қанағаттандырудан бас тарту – азаматтың конституциялық құқықтарының бұзылуы деп таныды.

Көші-қон қызметіне ұлтын өзгерту процедурасын аяқтау тапсырылды

Сот шешіміне сәйкес, ІІМ Көші-қон қызметі комитетіне азаматтың ұлтын белорустен неміс деп өзгерту бойынша мемлекеттік қызмет көрсету рәсімін аяқтау міндеттелді.