Оралда «Өрмекші адам» мен «Супермен» жол ережесін бұзды (ВИДЕО)

Оралда Marvel кейіпкерлері киген автокөлік шеруі жол ережесін бұзғаны үшін тоқтатылды, деп хабарлайды Azattyq Rýhy.

Облыстық Полиция департаментінің мәліметінше, 15 маусым күні Орал қаласында патрульдік полиция қызметкерлері бірнеше көліктен тұратын автокортежді тоқтатты. Көліктердегі жүргізушілер мен жолаушылардың барлығы Marvel киноәлемінің танымал кейіпкерлерінің костюмдерін киген.

Алайда ерекше образ олардың жол ережесін бұзған жауапкершілігінен босатпады. Барлық қатысушыға әкімшілік хаттама толтырылды.

Қандай жол ережелері бұзылды?

Тексеру нәтижесінде полиция қызметкерлері мынадай құқық бұзушылықтарды анықтады:

• ҚР ӘҚБтК 593-бап, 2-бөлік – қауіпсіздік белдігін тақпау: 11 хаттама;
• 590-бап, 5-бөлік – мемлекеттік тіркеу нөмірі талаптарын бұзу: 3 хаттама;
• 593-бап, 3-бөлік – алдыңғы орындықта белдік тақпаған жолаушыны тасымалдау: 1 хаттама;
• 595-бап, 1-бөлік – жол қиылыстарынан өту тәртібін бұзу: 1 хаттама;
• 590-бап, 2-бөлік – техникалық ақауы бар көлікті басқару: 1 хаттама.

Полиция ескерту жасады

Батыс Қазақстан облысы Полиция департаменті азаматтарды жолда барынша тәртіп сақтауға және жол қозғалысы ережелерін мүлтіксіз орындауға шақырады. Мерекелік шерулер, креативті костюмдер мен ерекше безендірулер – жолда жауапкершілік пен қауіпсіздік талаптарын елемеуге себеп болмауы тиіс.