Қазақстандық дзюдошы алтын медаль үшін күреседі
Қазақстан әйелдер құрамасының дзюдо бойынша көшбасшысы Әбиба Әбужақынова Будапеште өтіп жатқан дзюдодан әлем чемпионатының финалына жолдама алды. Ол 48 келіге дейінгі салмақ дәрежесінде ел намысын қорғап жатыр, деп хабарлайды Azattyq Rýhy.
Жартылай финалдық кездесуде Әбиба испаниялық спортшы Лаура Мартинес Абелендамен татамиге шықты. Қарсыласы үш ескерту алып, нәтижесінде отандасымыз таза жеңіске жетіп, шешуші белдесуге өтті.
Финалда Әбужақынова Италия елінің үмітін арқалап шыққан Асунта Скутто немесе франциялық дзюдошы Ширин Буклидің біреуімен белдеседі. Бұл екі мықтының жекпе-жегінің нәтижесіне қарай, Әбиба өзінің басты қарсыласын анықтайды.
Айта кету керек, Әбиба Әбужақынова бұған дейін әлем чемпионатының финалында өнер көрсетпеген. Алайда оның еншісінде осыған дейінгі әлем біріншіліктерінен екі қола медаль бар. Бұл жолы ол алғашқы алтын жүлдесіне қол жеткізуді мақсат етіп отыр.