Ақтауда үлескерлердің ақшасын жымқырған азамат 5 жылға сотталды

Ақтауда көпқабатты тұрғын үй кешеніндегі пәтерлерді заңсыз сатқан азамат 70 миллион теңге көлеміндегі үлескерлердің қаражатын иемденгені үшін сотталды, деп хабарлайды Azattyq Rýhy.

Өзге адамның атынан сөйлеп, 9 жалған келісімшарт жасаған

Маңғыстау облысы бойынша Қаржылық мониторинг агенттігі жүргізген тергеу барысында Корниенко Н.Н. ешқандай заңды өкілеттігі болмаса да өзін «СК 2032» тұрғын үй-құрылыс кооперативінің басшысы ретінде көрсетіп, «МИЗАМ» тұрғын үй кешеніндегі пәтерлерге қатысты 9 келісімшарт жасағаны анықталды.

Үлескерлердің 70 млн теңгесі жеке қажеттілікке жұмсалған

Жалған келісімшарттар арқылы ол азаматтардың 70 миллион теңге көлеміндегі қаражатын иемденіп, жеке мақсатына пайдаланған.

200 млн теңгелік мүлікке тыйым салынды

Тергеу нәтижесінде сот санкциясымен құны 200 млн теңге болатын 8 мың шаршы метр жер теліміне тыйым салынды. Бұл мүлік жәбірленушілердің азаматтық талаптарын өтеу үшін пайдаланылатын болады.

Сот үкімі: 5 жыл бас бостандығынан айыру

Сот Корниенко Н.Н.-ді 5 жылға бас бостандығынан айыру жазасын тағайындады. Сонымен қатар, ол келтірілген шығынды өтеуі тиіс.

«Baiqa, piramida!» Telegram-боты іске қосылды

Қаржылық мониторинг агенттігі азаматтарға қаржы алаяқтықтарынан сақ болуға кеңес береді. Қазіргі таңда қаржы пирамидаларының белгілерін анықтауға көмектесетін арнайы Telegram-бот – «Baiqa, piramida!» жұмыс істейді.