Күдіктінің үстінен алаяқтық бойынша іс қозғалды
Астана қаласында ресейлік әнші Моттың концертіне жоқ билеттерді интернет арқылы сатып, тұрғындарды алдаған күдікті қолға түсті, деп хабарлайды Azattyq Rýhy.
Мәдениет пен шоу-бизнес саласына қатысты танымал оқиғаларды пайдаланған күдікті Моттың концертіне жалған билет сату арқылы бірнеше адамды алдап соққан.
Polisia.kz мәліметінше, Нұра ауданының криминалдық полициясы интернет-алаяқтық фактісі бойынша күдіктіні ұстаған.
«Тергеу деректері бойынша, ол әлеуметтік желіде жалған хабарландыру жариялап, концертке билет сатамын деп уәде берген. Ақшаны өз шотына емес, танысының банк картасына аударуды сұраған. Ақша түскен соң, байланысқа шықпай, билеттерді жолдамаған», - деп мәлімдеді полиция департаменті.
Күдікті ұсталған кезде кінәсін толық мойындап, жасаған ісіне өкінетінін білдірген. Қазіргі уақытта сотқа дейінгі тергеу жүргізіліп жатыр. Сонымен қатар, оның осыған ұқсас басқа да алаяқтық істерге қатысы бар-жоғы тексерілуде.