Қытайдан Астанаға LRT вагондарының алғашқы легі жөнелтілді (ВИДЕО)

Қытайдың Таншань қаласынан Астана қаласына LRT-ның алғашқы екі заманауи пойызы жөнелтілді. Бұл туралы City Transportation Systems (CTS) компаниясының баспасөз қызметі мәлімдеді, деп хабарлайды Azattyq Rýhy. 

Жаңа LRT пойыздарының ерекшелігі

• Пойыздар автоматтандырудың 4-деңгейіне сай – толықтай жүргізушісіз басқарылатын
• Әр құрам 650 жолаушыны тасымалдай алады
• Барлығы 19 құрам жеткізіледі
• Алғашқы екеуі 2025 жылғы маусымда Астанаға келеді
• Қалған 17 пойыз жыл соңына дейін жеткізілмек

LRT желісі қашан іске қосылады?

CTS мәліметінше, сынақтық іске қосу 2025 жылдың қыркүйегіне жоспарланып отыр. Қазіргі таңда елордада LRT құрылысының негізгі жұмыстары аяқталуға жақын:

• Рельстер төселіп жатыр
• Станциялардың қасбеттері орнатылып жатыр
• Эстакадалар боялып, инженерлік желілер қосылуда
• Депо салу және абаттандыру жұмыстары жүргізілуде

Жөнелту рәсімі қалай өтті?

Құрамдардың ресми жөнелту рәсімі Қытайдың Таншань қаласында өтті. Оған қазақстандық тараптан CTS басқарма төрағасы Асылбек Дүйсебаев, ал қытайлық тараптан CRRC Tangshanзауытының төрағасы Чжоу Цюннянь мен CRAEC компаниясының директоры Чжоу Хайвэй қатысты.

Анықтама үшін

Астана LRT – елорда көлік инфрақұрылымын жаңғыртуға бағытталған стратегиялық жоба. Құрылыс жұмыстары алғаш рет 2011 жылы басталғанымен, түрлі себептермен кейінге шегерілген. Қазір жоба қайта жанданып, жолаушылар ағынын жеңілдетуге және экологиялық көлік инфрақұрылымын дамытуға бағытталған.