Сарыағашта ауыл мектебінің оқушысы әлемнің 40-қа жуық университетінен шақырту алды

Сарыағаш ауданының Қапланбек ауыл округіндегі Қанағат ауылында тұратын №7 Төле би атындағы жалпы білім беретін мектептің 11-сынып оқушысы Ақжүніс Атахан әлемнің 36 беделді университетінен шақырту алды, деп хабарлайды Azattyq Rýhy.

Халықаралық қатынастар мамандығын таңдаған

Ақжүніс Асылханқызы болашақта халықаралық қатынастар саласында кәсіби маман болуды армандайды. Ол бұл мамандық арқылы шетелдік білім мен мәдениетпен танысып, әлемдік тәжірибе жинап, елге қызмет етуді мақсат етеді.

5 елдің үздік университеттерінен шақырту

Ақжүніс өз білімін шетелде жалғастыру үшін:

• АҚШ – 17 университет,
• БАӘ (Дубай) – 5 университет,
• Түркия – 6 университет,
• Малайзия – 5 университет,
• Канада – 1 университетке құжат тапсырған.

Нәтижесінде барлығынан грантпен оқуға шақырту алды. Әсіресе Канададағы университет Ақжүніске президенттік стипендия тағайындаған.

ҰБТ-дан жоғары балл жинады

Білімді жас Қазақстанда да өз білімін дәлелдеді. Ол Ұлттық бірыңғай тестілеуден (ҰБТ) 111 балл жинап, үздік көрсеткіш көрсетті. Бұл оның жан-жақты дайындығы мен ізденісінің нәтижесі.

Мектеп қабырғасынан үздік атанған оқушы

Ақжүніс мектеп табалдырығын аттаған күннен бастап үздік оқушылар қатарында болды. Түрлі пәндік олимпиадалар мен ғылыми жобаларға қатысып, үздіксіз ізденумен көзге түскен. Ол – аталмыш мектептен алғаш рет шетел университеттерінен көптеп шақырту алған шәкірт.