Астанада халықтан 286 млн теңге жинаған әйел сотталып кетті

Астана қаласының қылмыстық істер жөніндегі ауданаралық соты қаржы (инвестициялық) пирамидасын құрып, оны басқарды деп айыпталған А-ға қатысты айыптау үкімін жариялады, деп хабарлайды Azattyq Rýhy.

Арнайы стратегия әзірлеген

Сотта А. «Happy Life KZ» ЖШС-нің құрылтайшысы бола отырып, осы компанияны пайдалану арқылы 2016 жылы қаржы пирамидасын құрғаны анықталды.

Ол желілік маркетинг түріндегі матрицалық жүйені қолданып, шақырылған жаңа салымшылардың санына байланысты әр түрлі деңгейдегі салымшыларды орналастырған, мұнда белгілі бір деңгейде қатысушылар құрылымға көтеріліп, төменгі деңгейден көтерілгендердің жарналарынан кіріс алып отырған.

«А. заңсыз іс-әрекетін жасыру үшін «Айсәуле» және «Қазбад» брендтерімен емдік сабын, сұлы сүті қосылған сабын, сүт сабыны, крем, сусабындарын, бетке арналған маскаларды, сарысулар мен тағамдық қоспалар сияқты нарықтық құны төмен тауарларды пайдалану үшін арнайы стратегияны әзірлеген», - деп жазылған соттың хабарламасында.

Салымшылар шу шығарды

2016-2024 жылдар аралығында пирамиданың қызметі бірқатар «Маркетингтік бағдарламалардың» мұқабасында жарияланып, оның шеңберінде салымшылардан таңдалған бағдарламаға байланысты 7 500 теңгеден 1 600 000 теңгеге дейін өзгермелі кіру жарналарының әртүрлі деңгейі талап етілген.

«Қаржы пирамидасының жұмыс істеуі өз қаражатын кейінірек салған салымшылардың ақшасын бұрын салған адамдардың пайдасына қайта бөлу арқылы қамтамасыз етілген», - дейді мамандар.

Алайда А.-ның қаржы пирамидасының қызметі тоқтаған кезде, мәселелер туындап компанияға ақша салған соңғы салымшылар өз қаражатын ала алмаған.

2016 жылдан 2024 жылға дейінгі кезеңде А.жалпы сомасы 286 миллион теңгеден асатын азаматтардың ақшалай қаражатын иемдеген, яғни аса ірі мөлшерде, оның ішінде 35 жәбірленушіге  жалпы сомасы 16 миллион теңгеден асатын материалдық зиян келтірген.

Сотталушы кінәсін мойындамады

Сот тергеуінің қорытындысы бойынша А.қаржы (инвестициялық) пирамидасын құрғаны және басқарғаны үшін кінәлі деп танылды.

Сотталушының кінәсі жәбірленушілердің, куәгерлердің айғақтарымен, сараптамалардың қорытындыларымен және қылмыстық іс материалдарымен дәлелденді. Прокурор А.-ны 7 жылға бас бостандығынан айыруды сұрады. Сотталушы кінәсін мойындамады, кінәсіздігіне байланысты ақтауды сұрады.

Жасалған қылмыстың мән-жайын және оның ауырлығын, келтірілген залалды өтемеуді, жеңілдететін және ауырлататын мән-жайлардың болуын, жәбірленушілердің пікірлерін ескере отырып, сот А.-ны азаматтардың ақшалай қаражатын және инвестицияларды тартуға байланысты қызметпен 7 жыл мерзімге айналысу құқығынан айыра отырып, 5 жыл мерзімге бас бостандығынан айыру жазасын кесті.

Сот жәбірленушілердің азаматтық талабын қанағаттандырды.Үкім заңды күшіне енген жоқ.