Каспий жағалауында жаңа курорт салынуы мүмкін

Белгілі кәсіпкер Эмин Агаларов Каспий теңізі жағалауында жаңа курорт салуға қызығушылық танытты. Бұл туралы Әзербайжанда Kazakh Tourism және Sea Breeze Resort компаниялары арасындағы ынтымақтастық туралы меморандумға қол қою барысында белгілі болды, деп хабарлайды Azattyq Ryhy.

Халықаралық туризмнің жаңа нүктесі

Kazakh Tourism-нің мәліметінше болашақ жоба үшін перспективалық локациялар ретінде табиғи әлеуеті бірегей Кендірлі және Жылы жағажайы аталды. Олар саяхатшыларды тартатын халықаралық туризмнің жаңа нүктесі бола алады.

«Kazakh Tourism» ҰК» АҚ басқарма төрағасының орынбасары Даниел Сержанұлы Маңғыстау өңірінің инвестициялық және туристік әлеуетін таныстырып, шетелдік инвесторларға арналған мемлекеттік қолдау шараларына назар аударды және одан әрі ынтымақтастыққа дайын екенін білдірді.

Жақын арада Эмин Агаларов Маңғыстауға келуді жоспарлап отыр. Онда ол жобаға ұсынылған әлеуетті орындарымен жеке танысады.

«Бізде екі міндет бар — елдеріміз арасындағы өзара туристік ағынды арттыру және Қазақстан аумағындағы Каспий теңізінің жағалауында осындай курорттық жобаны интеграциялау мүмкіндігін қарастыру», — деді Эмин Агаларов.

Делегация Sea Breeze жобасымен танысты

Сапар аясында қазақстандық делегация Бакудегі Sea Breeze жобасымен танысты. Қазіргі уақытта кешен 500 гектар аумақты және 7 шақырым жағалау сызығын қамтиды.

«Онда тұрғын үйлер, қонақ үйлер, мектептер, медициналық мекемелер, балабақшалар және демалыс аймақтары бар. Болашақта жоба аумағы 1300 гектарға, жағалау ұзындығы 22 шақырымға дейін ұлғаяды деп жоспарлануда», - деп жазылған хабарламада.

Курорттық аймақта экологияға ерекше назар аударылады. Қазірдің өзінде 10 миллионнан астам ағаш отырғызылып, баламалы энергия көздері белсенді түрде енгізілуде.