Өрт 320 шаршы метрге созылды
Тараз қаласындағы жанармай бекетінің жанында орналасқан құрылыс қоймасынан өрт шықты, деп хабарлайды Azattyq Rýhy ҚР Төтенше жағдайлар министрлігіне сілтеме жасап.
Төтенше жағдай Тараз қаласының Саңырық батыр көшесінде орналасқан құрылыс материалдары сақталған қоймада тіркелген. Өрт жанында орналасқан жанармай құю станциясына таралу қаупі болғанына қарамастан, оқиға орнына жедел жеткен өрт сөндірушілердің арқасында қызыл жалын дер кезінде ауыздықталды. Жалпы өрттің аумағы 320 шаршы метрді құраған.
Төтенше жағдайлар министрлігі өкілдерінің хабарлауынша, өрт сөндіру қызметі жылдам әрекет етіп, өртті оқшаулап, адам шығынына жол бермеді. Аталған дерек бойынша қажетті тергеу амалдары жүргізілуде.
«Саңырық батыр көшесінде орналасқан қоймада шыққан өрт жанармай бекетіне жетпей тоқтатылды. Зардап шеккендер жоқ. Қазіргі уақытта өрттің себебі анықталып жатыр», – делінген ТЖМ ресми хабарламасында.