Аллергиядан қалай қорғану керек екенін білесіз бе

Көктемнің келіп, өсімдіктер гүлдей бастады, бұл аллергиясы бар адамдардың денсаулығына айтарлықтай әсер етеді. Алайда уақтылы диагностика мен дұрыс жүргізілген профилактикалық шаралар толыққанды өмір сүруге мүмкіндік береді. Бұл жөнінде Алматы қаласының Қоғамдық денсаулық сақтау басқармасының бас аллерголог-иммунологы, медицина ғылымдарының докторы Таир Нұрпеисов өңірлік коммуникациялар қызметінің баспасөз конференциясында мәлімдеді, деп хабарлайды Azattyq Rýhy Almaty.tv телеарнасына сілтеме жасап.

Оның айтуынша, көктем-жаз мезгілінде ең белсенді аллергендер – ағаштардың тозаңы мен мамығы, атап айтқанда, терек, қайың, қарағаш, жөке, сондай-ақ кең таралған тимофеевканы қоса алғанда, шабындық шөптер. Кейінірек, шілде-тамыз айларында арамшөптердің – жусан, амброзия және басқа да өсімдіктердің гүлдеу маусымы басталады.

«Алматыда ағаш түрі өте көп, тіпті сирек жеміс беретін, бірақ соған қарамастан тозаң бөлетін субтропикалық түрлері де бар. Ауадағы тозаң концентрациясы кей жағдайда, әсіресе құрғақ әрі желді күндері, айтарлықтай жоғары болуы мүмкін», – деп атап өтті маман.

Сонымен қатар, ол аллергияны тек тозаң ғана емес, жыл бойы әсер ететін тітіркендіргіштер де қоздыруы мүмкін екенін айтты. Оларға үй шаңы, зең, үй жануарларының тері бөлшектері жатады. Сондықтан дер кезінде аллерголог-дәрігерге қаралып, өз бетінше емделмеу маңызды.

Сондай-ақ Нұрпеисов аллергия белгілерін жай суық тию немесе ЖРВИ-ден қалай ажыратуға болатынын түсіндірді.

Маусымдық аллергия кезінде көбіне көздің қышуы, түшкіру, дене қызуынсыз мұрыннан су ағуы және жыл сайын қайталанатын белгілер байқалады. Ал вирустық инфекциялар әлсіздік, дене қызуы және бұлшықет ауырсынуымен қатар жүреді. Дегенмен, оның айтуынша, кез келген жағдайда заманауи антигистаминдік препараттарды қабылдаудан бастау керек – олар ЖРВИ кезінде де, аллергиялық ринит кезінде де тиімді.

«Мен өз пациенттеріме емдеуді әрқашан аллергияға қарсы құралдардан бастауды ұсынамын. Әсіресе, дене қызуы 38.5 ° C-тан төмен болса, оны төмендетпеу маңызды», - деп атап өтті сарапшы.