Заңсыз айналымнан 10 млн-нан астам тыйым салынған дайын өнім тәркіленді
Түркістан облысында адам өмірі мен денсаулығына қауіп төндіретін заңсыз темекі өнімдерін (снюс) өндіру, сату және айналымға енгізу ісімен айналысқан қылмыстық топтың қызметі тоқтатылды, деп хабарлайды Azattyq Rýhy.
Қаржылық мониторинг агенттігінің мәліметінше, арнайы операцияның нәтижесінде 1 000 шаршы метр аумақта күнделікті 30-дан астам жұмыскер жұмыс істейтін заңсыз цех жойылды.
«Шикізат дайындау мен логистиканы ұйымдастырудан бастап Астана, Алматы, Шымкент қалаларында және басқа өңірлерде ірі көтерме жеткізушілер арқылы өткізу арналарына дейінгі қылмыстық қызметтің барлық схемасы анықталды.
Заңсыз айналымнан 10 млн-нан астам тыйым салынған дайын өнім, 28,8 млн бір реттік дозаны құрайтын 14,4 тоннадан астам темекі, 3,3 мың литрден астам хош иістендіргіш пен улы қоспалар, сондай-ақ өндірістік жабдықтар алынды.
Қосымша ақпарат ҚПК-тің 201-бабына сәйкес жариялауға жатпайды», - делінген ҚМА хабарламасында.