Прокуратура 78 млн теңге сомасына мемлекет қаражатының заңсыз жұмсалуына жол бермеді
Ақмола облысында 1,5 жыл бұрын ғана ашылған мектепке 78 млн теңгеге жөндеу жүргізілмек болғаны анықталды, деп хабарлайды Azattyq Rýhy.
Қаланың білім беру мекемесі 78 млн теңге сомасына бюджет қаражаты есебінен шатырды жөндеу жұмыстарын жүргізуді жоспарлаған. Алайда, қала прокуратурасы мектеп ғимаратының бір жарым жыл бұрын ғана пайдалануға берілгенін және кепілдік қызметінде тұрғанын анықтады. Сәйкесінше, барлық жөндеу жұмысы мердігер есебінен жүргізілуі тиіс.
«Прокуратура енгізген қадағалау актінің нәтижелері бойынша мемлекеттік сатып алудың күші жойылды, кінәлі адамдар заңмен белгіленген жауапқа тартылды, ал тиімсіз жоспарланған бюджет қаражаты басқа да әлеуметтік бағдарламаларды жүзеге асыруға бағытталды.
Осы бағыттағы жұмыс жалғасуда», - делінген прокуратура хабарламасында.