Назым Қызайбай 100 мың АҚШ доллардан алатын болды: бокстан әлем чемпионатының нәтижесі шықты

2025 жылы 9-16 наурыз күндері аралығында Ниш (Сербия) қаласында өткен әйелдер арасындағы жаһандық дода өз мәресіне жетті, деп хабарлайды Azattyq Rýhy.

Қазақстан құрамасының арулары әлем чемпионаты барысында 35 жекпе-жек өткізіп (Еуропа - 16, Азия - 10, Африка - 4, Оңтүстік Америка - 2, Солтүстік Америка - 2, бейтарап - 1), оның 26-сында жеңіске жетті. 

Соның арқасында Қазақстан (3 алтын, 2 күміс, 1 қола) нәтижесімен тек Ресейге (4 алтын, 1 күміс, 2 қола) ғана есе жіберіп, жүлде кестесінде екінші орынға тұрақтады. Қазақстан әйелдер құрамасы өз тарихындағы екінші үздік нәтижені көрсетті.

ҚР ТСМ Спорт және дене шынықтыру істері комитеті хабарлауынша, жүлде қоры төмендегідей:

• 1-орын - 100 мың АҚШ доллары
• 2-орын - 50 мың АҚШ доллары
• 3-орын - 25 мың АҚШ доллары
• Ширек финалистер - 10 мың АҚШ долларын иемденеді. 

Елімізден кімдер жүлде алды?

• 48 келі. Назым Қызайбай (31 жас) – алтын
• 50 келі. Алуа Балқыбекова (29 жас) – алтын
• 63 келі. Аида Әбікеева (26 жас) – алтын
• 60 келі. Виктория Графеева (23 жас) – күміс
• +81 келі. Елдана Талипова – күміс
• 70 келі. Наталья Богданова (25 жас) – қола

Қазақстан, Сербия, Ресей, Өзбекстан елдері ғана барлық салмақта 12 боксшысын жарысқа қосты. Жалпы 51 мемлекет қатысты.