Батыс Қазақстан облысының тұрғынын декреттік демалыста жұмыстан шығарып жіберген
Ол жұмыс берушіні сотқа берді
Батыс Қазақстан облысында декреттік демалысқа шыққаннан кейін жұмыстан босатылған әйел сот шешімімен қызметіне қайта оралды және моральдық шығын өтемақысын алды, деп хабарлайды Azattyq Rýhy соттың баспасөз қызметіне сілтеме жасап.
Жаңақала аудандық ветеринариялық стансасының қызметкері жұмыс берушінің үстінен сотқа арыз түсірген. Ол жұмыста болмағаны туралы актіні, қатаң сөгісті және еңбек шартын бұзу туралы бұйрықты заңсыз деп тануды талап еткен.
Бірінші сатыдағы сот оның талабын ішінара қанағаттандырды: жұмыстан қалу туралы акт пен қатаң сөгіс қаулысының күші жойылып, еңбек шартын бұзу заңсыз деп танылды. Әйел мәжбүрлі түрде жұмыста болмаған кезеңдегі жалақысын өндіріп алып, қызметіне қайта орналасты.
Сонымен қатар сот оның материалдық жағдайы мен келтірілген шығынды ескере отырып, моральдық зиян өтемақысын ішінара қанағаттандырды. Әйел сот шешімімен келіспей, апелляциялық шағым түсірген.
