Полиция капитаны адам өмірін қалай құтқарып қалған туралы айтты
Астанада жүрегі қысылып, үйінен шыға алмай қалған тұрғынға полиция қызметкері жылдам жетіп, көмек көрсеткен, деп хабарлайды Azattyq Rýhy.
Астана әкімдігінің мәліметінше, қалалық ПД Патрульдік полиция полкінің аға инспекторы Дулат Ыдырысов адам өмірін құтқарып қалғаны үшін Президенттің «Жауынгерлік ерлігі үшін» медалімен марапатталды.
Полицей оқиғаның қалай болғаны жөнінде ой бөлісті. Оның айтуынша, құтқару қызметін күтетін уақыт болмағандықтан, жылдам әрекет етуге тура келген көрінеді.
«Бізге бір адамның жүрегі ауырып, есікті өз бетімен аша алмай қалғаны туралы қоңырау түсті. Жақын жерде болғандықтан дереу көмекке ұмтылдық. Оқиға орнына жетіп, есікті өз бетімізбен ашпақ болған ойымыз жүзеге асқан жоқ. Ал құтқару қызметі мен жедел жәрдем шақырмақ болғанымызбен, уақытымыз тығыз болды. Сондықтан терезе арқылы екінші қабаттағы терезе арқылы кіруге тура келді.
Біздің қызметімізде түрлі жағдайлар болып жатады. Сол себепті, біз, полиция қызметкерлері, тәртіпті күзетіп, халық игілігі үшін қызмет етуге қашанда дайынбыз. Біз бұл ісімізді ерлік деп санамаймыз. Бұл – біздің жұмысымыз», - дейді полиция капитаны.