Анасы мен өгей әкесі оқушы қызды зорлап, азаптап өлтірген: ер адам өмір бойына сотталды
Ал анасы 19 жылға сотталып кетті
Талдықорғанда із-түзсіз жоғалып кеткен мектеп оқушысын туған анасы мен өгей әкесі азаптап өлтіргені анықталған. Жұртты шошытқан қанды қылмыста күдіктілердің кінәсі толық дәлелденді, деп хабарлайды Azattyq Rýhy.
Almaty.tv мәліметінше, 14 жастағы қызға күш қолданып, сексуалдық сипатта әрекеттер жасаған 39 жастағы ер адам өмір бойына сотталды. Ал қыз баланың туған анасы 19 жылға сотталды.
«Сот үкімімен Айсабагиев Қылмыстық кодекстің 121, 110 және 99-бабының бірнеше тармағы бойынша, ал жасөспірімнің анасы «Адам өлтіру және азаптау» баптарымен кінәлі деп танылды. Олар жазасын төтенше қауіпсіз және орташа қауіпсіз мекемеде өтейді. Сондай-ақ, жәбірленуші тараптың моральдық залалға өтемақы өндіру туралы талап арызы ішінара қанағаттандырылып, 15 миллион теңге мөлшерінде айыппұл салынды», – деді Қылмыстық істер жөніндегі мамандандырылған ауданаралық соттың судьясы Әділет Бақытов.
Айта кетейік, Карина Дорохинаның жоғалып кеткені 2023 жылдың 28 желтоқсанында белгілі болған. Полиция қыздың мәйітін былтыр 8 қаңтарда Текелі қаласының маңындағы таудан тапқан. Кейін оқушының бірнеше ай бойы сабаққа қатыспағаны, сондай-ақ 2023 жылы 6 қарашада қайтыс болғаны анықталды.
