Бухгалтерден әкімге дейін: Түркістан облысының жаңа басшысы 40 жасына дейін қандай жетістікке жетті

Бүгін Түркістан облысында әкім ауысып, Дархан Сатыбалдының орнына Нұралхан Көшеров тағайындалды. Жаңа әкім туралы не белгілі? Azattyq Rýhy шенеуніктің өмірбаянына тоқталып шықты.

Нұралхан Көшеров әкім болып тағайындалғанға дейін облыс басшысының орынбасары қызметінде болды. Ол бұл лауазымға басқа қызметке ауысқан Арман Сәбитовтің орнына келгені белгілі. Сол сияқты оның бүгінге дейін бірнеше мамандықты оқып үлгергені белгілі болды.

Нұралхан Көшеров 1984 жылы 20 желтоқсан күні Шымкент қаласында дүниеге келген. Ол М.Әуезов атындағы Оңтүстік-Қазақстан Мемлекеттік университеті, Қазақ Гуманитарлық заң университеті, Мәскеудегі Ресей Федерациясы Президентінің жанындағы Ресей халық шаруашылығы және Мемлекеттік қызмет академиясы жоғары білім беретін мемлекеттік бюджеттік білім беру мекемесінде білім алған. Жаңа әкім 40 жасына дейін экономист, қаржы және несие, құқықтану мамандықтарын меңгеріп үлгерген.

Еңбек жолын 2008 жылы ҚР Парламенті Мәжілісі депутатының көмекшісі болып бастағаны туралы ақпарат тараған. Алайда, Түркістан облысының әкімдігі таратқан мәліметте Нұралхан Көшеров Шымкентте 2005-2007 жылдары «Береке» ЖШС-ның бухгалтер-инспекторы және экономист-инспекторы болғаны айтылған.

• 2009-2011 жылдары Қаржы министрлігінің Салық комитетінде талдаушы, Астана қаласы Салық департаментінің Алмалы ауданы бойынша салық басқармасының заңды тұлғалардың салық аудиті бөлімінің бас маманы болып еңбек етті.
• 2010-2014 жылдар аралығында Астана қаласының Салық департаменті Есіл ауданының салық басқармасы бастығының орынбасары қызметін атқарды.
• 2014 жылдан 2015 жылға дейін Астана қаласы Есіл ауданы бойынша Мемлекеттік кірістер басқармасының бастығы, Қаржы министрлігі Салық комитетінің Астана қаласы бойынша Салық департаменті басшысының орынбасары болды.
• 2015-2018 жылдары Шымкент қаласы әкімінің орынбасары, 2018-2021 жылдары ҚР Қаржы министрлігінің Мемлекеттік кірістер комитеті Маңғыстау облысы бойынша Мемлекеттік кірістер департаментінің Ақтау қаласы бойынша Мемлекеттік кірістер басқармасының басшысы, ҚР Қаржы министрігінің Мемлекеттік кірістер комитеті Шымкент қаласы бойынша Мемлекеттік кірістер департаментінің басшысы лауызымдарын еңбек етті.
• 2021 жылдан 2023 жылдың қаңтарына дейін Қазақстан Республикасы Қаржы министрлігінің Мемлекеттік кірістер комитеті Атырау облысы бойынша Мемлекеттік кірістер департаментінің басшысы қызметін атқарды.
• 2023 жылдан бүгінге дейін Түркістан облысы әкімінің орынбасары болды.