АҚШ-тың экс-президенті 100 жасында қайтыс болды

Америка құрама штаттарының 39-шы президенті және 2002 жылғы Нобель сыйлығының лауреаты Джимми Картер 29 желтоқсан күні Джорджия штатының Плейнс қаласындағы өз үйінде қайтыс болды. Ол 100 жасқа келіп, өмірден өтті, деп хабарлайды Azattyq Rýhy агенттігі The Carter center-ге сілтеме жасап.

Ол АҚШ тарихындағы ең ұзақ өмір сүрген президент болды.

Экс-президент Картердің артында балалары – Джек, Чип, Джефф және Эми есімді балалары, сол сияқты 11 немересі мен 14 шөбересі қалды. Джимми Картердің жұбайы Розалин 2023 жылдың 19 қарашасында 96 жасында өмірден өткен.

«Әкем мен үшін ғана емес, әлемдегі бейбітшілікке, адам құқықтарына және сүйіспеншілікке сенетіндердің бәрі үшін батыр болды», - деп еске алды экс-президенттің ұлы Чип Картер.

Атланта мен Вашингтонда қоғамдық рәсімдер, Плейнсте жерлеу рәсімі өтеді.

Картер отбасы гүл шоқтарының орнына The Carter Center-ге қайырымдылық жасауды сұрады.

Джимми Картер (Толық аты-жөні – кіші Джеймс Эрл Картер,) 1924 жылы 1 қазанда Плейнсте дүниеге келген. Ол 1977 жылдан 1981 жылға дейін АҚШ президенті болды.