Полиция үй жануарларының барлық әрекеттері үшін иелері жауап беретінін еске салды
Павлодарда үй жануарларын ұстайтын екі жүзге жуық тұрғын жазаланды, деп хабарлайды Azattyq Rýhy.
Жергілікті Pavlodarnews.kz порталының жазуынша, жыл басынан бері өңірдегі полиция қызметкерлері үй жануарларын ұстау және серуендету ережелерін бұзғаны үшін 196 иесін жауапқа тартты.
Облыстық полиция департаменті баспасөз қызметінің мәліметінше, қала тұрғыны полиция бөлімшесіне үлкен итті тұмылдырықсыз серуендететін, сол арқылы өтіп бара жатқан жандарды қорқытатын адамға қатысты шаралар қабылдауды өтінген.
«Кенжекөл ауылының маңындағы көліктер арасындағы жолда мойынтағы бар ит жүгіріп келе жатқаны туралы арыз түсті. Учаскелік полиция инспекторлары иттердің иелерін анықтап, жауапқа тартты», – деп хабарлады департамент.
Иттің иелері олардың иттері ешкімге тиіспейді деп өздерін ақтамақ болған. Сонда да полиция үй жануарларының барлық әрекеттері үшін иелері жауап беретінін және итті ұстау ережелерін сақтап, итті ешқашан қоғамдық орындарда қарғыбаусыз жібермеудің маңызды екенін еске салды.